قصيده

عزيزة يا بيوت الطين لك وسط الحشا منزال

شعر / عبدالله سليمان العـمّـار





يشوق العين شوف اللي بقى من شامخ الاطلال
والاقي في سككها كل ذكـرى عشقهـا غالـي
أسوق اقدام شوقي للبيـوت وخاطـري مـازال
يعيش بشوفهن ذكـرى طفولـة تحفـظ آمالـي
عزيزة يا بيوت الطين لك وسط الحشـا منـزال
امرك واترك دموع الغلا تحكـي لـك احوالـي
اجي لك كل ما جا للحزن فـي داخلـي مدهـال
واجي لك كل مافاض الحنين لشـوف مدهالـي
اروح البير لين اني اوقـف عنـد حـد الجـال
واطل بوسطه ودمعي تناثـر فيـه مـن عالـي
وامر السكه اللي في وسطها حفـرة المصقـال
وانا اغلى شي ملكته وقتها هو كسب مصقالـي
فقدت بها رفيق ٍ لا لقيتـه قـال كيـف الحـال
رفيق ٍ وافي وطيّب ولا قد غـاب عـن بالـي
واجي عند الشعيب اللي يمر بديرتـي لا سـال
هنا ذكرى وقوفي فـي وسطـه وسيلـه قبالـي
واروح لبيت عمّي وان طلعت امر بيـت الخـال
واروح لجدتي واطلـع وفـي مخباتـي ريالـي
اطير بفرحتي واللي سالني قلـت معـي ريـال
واروح اشري من الدكان توت مثلـج وحالـي
واروح لبيت جيرانـي وادوّر وينـه المدخـال
انا اذكر يوم انا صغيّر نسيت بوسطـه نعالـي
هنا اذكر معاليـق السـراج وحولـه المنخـال
وهناك الدلـه اللـي عندهـا مكسـور فنجالـي
وهنا فراش الحصير اللي جلس به مستريح البال
ينـام ومـا بقلبـه شـي لـلأول ولا التـالـي
كفايه .. بطلع من البيت يوم انـه بـدا ينهـال
مع اني صرت احس ان التراب دموع تنهالـي
عسى الله يرحم اللي مات منهم طيبيـن الفـال
ويجمعنا معاهـم فـي وسـط جنـات وظلالـي
تمر سنين مـن عمـري واردد للمـلا مـوال
ترى اللي ماله اول مالـه بهـذا الزمـن تالـي





راقت لي